ശസ്ത്രക്രിയക്കിടെ വയറില് കത്രിക കുടുങ്ങിയ സംഭവത്തില്
ആദ്യം അന്വേഷിച്ച സമിതിയുടെ റിപ്പോര്ട്ടില് കൂടുതല് വ്യക്തത വരുത്താന് വിശദമായ ശാസ്ത്രീയ അന്വേഷണം: മന്ത്രി വീണാ ജോര്ജ്
കോഴിക്കോട് മെഡിക്കല് കോളേജില് 5 വര്ഷം മുമ്പ് ശസ്ത്രക്രിയയ്ക്കിടെ കത്രിക കുടുങ്ങിയെന്ന പരാതിയിന്മേല് ആദ്യം അന്വേഷിച്ച സമിതി സമര്പ്പിച്ച റിപ്പോര്ട്ടില് കൂടുതല് വ്യക്തത വരുത്താന് വിശദമായ ശാസ്ത്രീയ അന്വേഷണം നടത്താന് അഡീഷണല് ചീഫ് സെക്രട്ടറിയെ ഇതിനകം ചുമതലപ്പെടുത്തിയതായി ആരോഗ്യ വകുപ്പ് മന്ത്രി വീണാ ജോര്ജ്. ഇതുവരെയുള്ള നടപടികള് സ്വീകരിച്ചത് ശസ്ത്രക്രിയയ്ക്ക് വിധേയമായ സ്ത്രീയുടെ പക്ഷത്തു നിന്നു തന്നെയാണ്.
മെഡിക്കല് വിദ്യാഭ്യാസ ഡയറക്ടറേറ്റ് സ്പെഷ്യല് ഓഫീസര് കോര്ഡിനേറ്ററായ അന്വേഷണ സംഘം നേരത്തെ അന്വേഷണം നടത്തി റിപ്പോര്ട്ട് നല്കിയിരുന്നു. എന്നാല് സംഭവത്തെപ്പറ്റി കൂടുതല് അന്വേഷിക്കണമെന്ന് കണ്ടെത്തിയതിനെ തുടര്ന്നാണ് നടപടിയെന്നും മന്ത്രി പറഞ്ഞു.