ഡോക്ടര്മാര്ക്കെതിരെയുളള അക്രമങ്ങള്ക്കെതിരെ സംസ്ഥാന വ്യാപകമായി ഡോക്ടര്മാരുടെ പണിമുടക്ക് സമരം ആരംഭിച്ചു
കോഴിക്കോട്ടെ ആശുപത്രിയില് ഡോക്ടറെ അക്രമിച്ച സംഭവത്തിലെ പ്രതികളെ അറസ്റ്റ് ചെയ്യാന് വൈകുന്നതില് പ്രതിഷേധിച്ച് സംസ്ഥാന വ്യാപകമായി ഡോക്ടര്മാര് ഇന്ന് പണിമുടക്കും. രാവിലെ 6 മുതല് വൈകിട്ട് 6 വരെയാണ് ഐഎംഎയുടെ നേതൃത്വത്തിലുളള സമരം.
ഇതിനോടനുബന്ധിച്ച് സ്വകാര്യ, സര്ക്കാര് ആശുപത്രികളില് ഒ പി വിഭാഗം പ്രവര്ത്തിക്കില്ല. അത്യാഹിത വിഭാഗം മാത്രമായിരിക്കും പ്രവര്ത്തിക്കുക. മുന്കൂട്ടി നിശ്ചയിച്ച ശസ്ത്രക്രിയകള് ഉണ്ടാകില്ലെങ്കിലും അടിയന്തര ശസ്ത്രക്രിയകള് നടത്തും. സ്വകാര്യ മെഡിക്കല് കോളേജുകളില് അത്യാഹിത വിഭാഗവും അടിയന്തര ശസ്ത്രക്രിയ വിഭാഗവും മാത്രമേ പ്രവര്ത്തിക്കുകയുള്ളൂ.
കോഴിക്കോട് ഫാത്തിമ ആശുപത്രിയിലെ ഡോക്ടറെ ആക്രമിച്ച പ്രതികളെ പിടികൂടാത്തതിലും, തുടര്ച്ചയായി സംസ്ഥാനത്തിന്റെ വിവിധ ഭാഗങ്ങളില് ഡോക്ടര്മാര്ക്കെതിരായ അതിക്രമങ്ങള് വര്ധിക്കുന്ന സാഹചര്യത്തിലുമാണ് ഒ പി ബഹിഷ്കരിച്ചുകൊണ്ടുള്ള ഡോക്ടര്മാരുടെ സമരം. കേരള ഗവണ്മെന്റ് പോസ്റ്റ് ഗ്രാജുവെറ്റ് മെഡിക്കല് ടീച്ചേഴ്സ് അസോസിയേഷന്, കേരള ഗവണ്മെന്റ് സ്പെഷലിസ്റ്റ് ഡോക്ടര്സ് അസോസിയേഷന്, ഇന്ത്യന് ഡെന്റല് അസോസിയേഷന് എന്നിവയും പണിമുടക്കില് പങ്കെടുക്കും.