മെഡിക്കല് കോളേജ് ഐ.സി.യുവിലെ തീപ്പിടിത്തം
തിരുവനന്തപുരം : മെഡിക്കല് കോളേജ് മള്ട്ടി സ്പെഷ്യാലിറ്റി ബ്ലോക്കിലെ സര്ജിക്കല് ഐ.സി.യു വിലുണ്ടായ തീപ്പിടുത്തത്തിന് പിന്നാലെ ഐ.സി.യുവില് നിന്നും മാറ്റിയ 5 രോഗികള് മരിച്ചതില് ദുരൂഹതയുണ്ടെന്ന ആരോപണത്തെകുറിച്ച് ഉന്നതതല അന്വേഷണം നടത്തണമെന്ന് മനുഷ്യാവകാശ കമ്മീഷന് ചെയര്പേഴ്സണ് ജസ്റ്റിസ് അലക്സാണ്ടര് തോമസ്. പത്രവാര്ത്തയുടെ അടിസ്ഥാനത്തില് കമ്മീഷന് സ്വമേധയാ കേസെടുത്തു.
ആരോഗ്യവകുപ്പ് അഡീഷണല് ചീഫ് സെക്രട്ടറിക്കാണ് നിര്ദ്ദേശം നല്കിയത്. സംഭവത്തെകുറിച്ച് കേള്ക്കുന്ന കാര്യങ്ങള് വിശദവും സുതാര്യവുമായി പരിശോധിക്കണം. ഐ.സി.യുവില് നിന്നും രോഗികളെ യഥാസമയം മാറ്റുന്നതിനായി സ്വീകരിച്ച നടപടികള്, അഞ്ചു രോഗികളുടെ മരണകാരണം, പോസ്റ്റ്മോര്ട്ടം റിപ്പോര്ട്ടിലെ വസ്തുതകള്, ഫോറന്സിക് വിദഗ്ദ്ധന്റെ അഭിപ്രായം തുടങ്ങിയ വിവരങ്ങള് ക്രോഡീകരിച്ച് തയ്യാറാക്കുന്ന റിപ്പോര്ട്ട് 5 ആഴ്ചക്കുള്ളില് കമ്മീഷനില് സമര്പ്പിക്കണം.
ഡോക്ടര്മാര്, മറ്റ് ജീവനക്കാര്, കൂട്ടിരിപ്പുകാര്, മരിച്ചവരുടെ ബന്ധുക്കള് എന്നിവരുടെ മൊഴി അന്വേഷണ ഉദ്യോഗസ്ഥര് രേഖപ്പെടുത്തണം. സംഭവവുമായി ബന്ധപ്പെട്ട ആശുപത്രി രേഖകള്, പോസ്റ്റ്മോര്ട്ടം സര്ട്ടിഫിക്കറ്റ്, ഫോറന്സിക് വിദഗ്ദ്ധന്റെ നിഗമനം എന്നിവ റിപ്പോര്ട്ടിനൊപ്പം കമ്മീഷനില് ഹാജരാക്കണം. മരിച്ചവരുടെ ബന്ധുക്കള് പരാതി നല്കിയിട്ടുണ്ടോയെന്ന് അന്വേഷിക്കണം.
അങ്ങനെയുണ്ടെങ്കില് എഫ്.ഐ.ആര്. രജിസ്റ്റര് ചെയ്തിട്ടുണ്ടോ എന്ന് ഉറപ്പാക്കണം.മെഡിക്കല് വിദ്യാഭ്യാസ ഡയറക്ടര് സംഭവത്തെ കുറിച്ച് പ്രത്യേകം റിപ്പോര്ട്ട് സമര്പ്പിക്കണമെന്നും ജസ്റ്റിസ് അലക്സാണ്ടര് തോമസ് ആവശ്യപ്പെട്ടു. സര്ക്കാരിന്റെയും ഡി.എം.ഇ. യുടെയും പ്രതിനിധി മേയ് 8 ന് കമ്മീഷന്റെ ആസ്ഥാനത്ത് നടക്കുന്ന സിറ്റിംഗില് നേരിട്ട് ഹാജരാകണമെന്നും കമ്മീഷന് നിര്ദ്ദേശിച്ചു.