നീറ്റ് പുനപരീക്ഷ റദ്ദാക്കണമെന്ന ഹർജി സുപ്രീംകോടതിയിൽ; പരീക്ഷാ വിവാദവും ടെലഗ്രാം നിയന്ത്രണവും ചർച്ചയിൽ

ദില്ലി: നീറ്റ് പുനപരീക്ഷ റദ്ദാക്കണമെന്നാവശ്യപ്പെട്ട് സുപ്രീംകോടതിയിൽ ഹർജി. പുനപരീക്ഷ നടത്താനുള്ള തീരുമാനം റദ്ദാക്കണമെന്നാണ് ഡോ. മംഗള കോഹ്ലി നൽകിയ ഹർജിയിലെ പ്രധാന ആവശ്യം. രാജ്യത്തെ ചില സെന്ററുകളിൽ മാത്രം ചോദ്യപേപ്പർ ചോർന്ന സാഹചര്യത്തിൽ മുഴുവൻ പരീക്ഷ റദ്ദാക്കിയത് നിയമവിരുദ്ധമാണെന്ന് ഹർജിയിൽ പറയുന്നു.

ക്രമക്കേട് നടന്ന കേന്ദ്രങ്ങളിൽ മാത്രം പരീക്ഷ റദ്ദാക്കേണ്ടതായിരുന്നുവെന്നാണ് ഹർജിക്കാരിയുടെ വാദം. ആദ്യ പരീക്ഷ റദ്ദാക്കിയ വിജ്ഞാപനവും തുടർന്ന് പുനപരീക്ഷ നടത്താനുള്ള നോട്ടിഫിക്കേഷനും റദ്ദാക്കണമെന്നാണ് സുപ്രീംകോടതിയോട് ആവശ്യപ്പെടുന്നത്. ഹർജി ഇന്ന് പരിഗണിച്ചേക്കുമെന്നാണ് വിവരം.

മെയ് 3ന് നടന്ന നീറ്റ് പരീക്ഷ ചോദ്യപേപ്പർ ചോർച്ച ആരോപണത്തെ തുടർന്ന് റദ്ദാക്കിയിരുന്നു. തുടർന്ന് ജൂൺ 21ന് പുനപരീക്ഷ നടത്താൻ ദേശീയ പരീക്ഷ ഏജൻസി (NTA) തീരുമാനിക്കുകയായിരുന്നു.

പുനപരീക്ഷ മാറ്റിവയ്ക്കണമെന്ന ആവശ്യവുമായി വിദ്യാർത്ഥികളും രംഗത്തെത്തി. 1467 വിദ്യാർത്ഥികൾ എൻടിഎയ്ക്ക് നിവേദനം നൽകിയിട്ടുണ്ട്. പരീക്ഷയ്ക്ക് വേണ്ട തയ്യാറെടുപ്പിന് സമയം ലഭിച്ചില്ലെന്നും കുറഞ്ഞ നോട്ടീസ് കാരണം ബുദ്ധിമുട്ടുണ്ടായെന്നും വിദ്യാർത്ഥികൾ ആരോപിക്കുന്നു.

ഇതിനിടെ പരീക്ഷാ സുരക്ഷ ശക്തമാക്കുന്നതിന്റെ ഭാഗമായി കേന്ദ്ര സർക്കാർ കർശന നടപടികൾ സ്വീകരിച്ചു. ചോദ്യപേപ്പർ ചോർച്ച തടയാൻ ഇന്ത്യയിൽ ടെലഗ്രാമിന് ജൂൺ 22 വരെ താൽക്കാലിക നിയന്ത്രണം ഏർപ്പെടുത്തിയിട്ടുണ്ട്. മെസേജ് എഡിറ്റ് ഫീച്ചറും ജൂൺ 30 വരെ നിർത്തിവച്ചതായി റിപ്പോർട്ടുകളുണ്ട്. ചോദ്യപേപ്പർ ചോർച്ചയുമായി ബന്ധപ്പെട്ട നിരവധി ടെലഗ്രാം ചാനലുകളും ബോട്ടുകളും നീക്കം ചെയ്തതായും അധികൃതർ അറിയിച്ചു.

ഓൺലൈൻ വഴി ചോദ്യപേപ്പർ ലഭ്യമാക്കാമെന്ന വാഗ്ദാനങ്ങൾ തട്ടിപ്പാണെന്ന് എൻടിഎ മുന്നറിയിപ്പ് നൽകി. വിവിധ സംസ്ഥാനങ്ങളിൽ അന്വേഷണം തുടരുന്നതിനിടെ പരീക്ഷാ ക്രമക്കേടുകൾ തടയാനുള്ള നടപടികൾ കൂടുതൽ കടുപ്പിക്കുകയാണ് സർക്കാർ.