നടിയെ ആക്രമിച്ച കേസില് ദിലീപ് സുപ്രീംകോടതിയില്; ഹര്ജിയില് അതിജീവിതയ്ക്കും മുന് ഭാര്യക്കുമെതിരെ ഗുരുതര ആരോപണങ്ങള്
ന്യൂഡല്ഹി: നടിയെ ആക്രമിച്ച കേസില് പ്രതി ദിലീപ് സുപ്രീം കോടതിയെ സമീപിച്ചു. വിചാരണ സമയ ബന്ധിതമായി പൂര്ത്തിയാക്കാന് വിചാരണ കോടതിക്ക് നിര്ദേശം നല്കണമെന്ന് ആവശ്യപ്പെട്ടാണ് ദിലീപ് ഹര്ജി സമര്പ്പിച്ചിച്ചിരിക്കുന്നത്. കേസില് ഒരിക്കല് വിസ്തരിച്ചവരെ വീണ്ടും വിസ്തരിക്കരുതെന്നും ദിലീപ് ഹര്ജിയില് ആവശ്യപ്പെടുന്നു.അതിജീവിതയ്ക്കും മുന് ഭാര്യക്കുമെതിരെ ഗുരുതര ആരോപണങ്ങളാണ് അപേക്ഷയില് ഉള്ളത്. അന്വേഷണ ഉദ്യോഗസ്ഥര്, പ്രോസിക്യുഷന്, അതിജീവിത എന്നിവര് വിചാരണ പൂര്ത്തിയാക്കി വിധി പറയാന് വിചാരണ കോടതി ജഡ്ജിയെ തടസ്സപ്പെടുത്തുന്നുവെന്നാണ് ദിലീപിന്റെ ആരോപണം.
മലയാള സിനിമ മേഖലയിലെ ചെറുത് ആണെങ്കിലും ശക്തരായ ഒരു വിഭാഗമാണ് തന്നെ ഈ കേസില് പെടുത്തിയത്. ഇവര്ക്ക് തന്നോട് വ്യക്തിപരവും തൊഴില് പരവുമായ ശത്രുത ഉണ്ടെന്നും തന്റെ മുന് ഭാര്യയുടെയും, അതിജീവിതയുടെയും അടുത്ത സുഹൃത്തായ ഒരു ഉന്നത പൊലീസ് ഓഫീസറും തന്നെ കേസില് പെടുത്തിയതിന് ഉത്തരവാദിയാണെന്നുമാണ് ദിലീപ് ഹര്ജിയില് പറയുന്നത്. ഈ പൊലീസ് ഓഫീസര് നിലവില് ഡിജിപി റാങ്കില് ആണെന്നും സുപ്രീം കോടതിയില് ഫയല് ചെയ്തിരിക്കുന്ന അപേക്ഷയില് ദിലീപ് ആരോപിച്ചിട്ടുണ്ട്.