നേതാക്കള്ക്കെതിരെയുള്ള ആരോപണം, സിമി റോസ് ബെല് ജോണിനെ കോണ്ഗ്രസ് പുറത്താക്കി
തിരുവനന്തപുരം: പ്രതിപക്ഷ നേതാവ് വി ഡി സതീശനടക്കമുള്ളവര്ക്കെതിരെ ആരോപണമുന്നയിച്ച മുന് എ ഐ സി സി അംഗം സിമി റോസ് ബെല് ജോണിനെ കോണ്ഗ്രസില് നിന്ന് പുറത്താക്കി. കെപിസിസി പ്രസിഡന്റ് അടക്കം മറ്റു നേതാക്കളുടെ പിന്തുണ ഉണ്ടായിട്ടും പാര്ട്ടി ഭാരവാഹിത്വത്തിലേക്ക് വരാന് സതീശന് അനുവദിക്കുന്നില്ല എന്ന ആരോപണമാണ് കഴിഞ്ഞ ദിവസം സിമി സ്വകാര്യ ടി വി ചാനലിലൂടെ ഉന്നയിച്ചത്. കോണ്ഗ്രസിലെ വനിതാ നേതാക്കളെയടക്കം അധിക്ഷേപിച്ച മുന് എ ഐ സി സി അംഗവും പി എസ് സി അംഗവുമായിരുന്ന സിമി റോസ് ബെല് ജോണിനെ പാര്ട്ടിയുടെ പ്രാഥമിക അംഗത്വത്തില് നിന്ന് കെ പി സി സി പ്രസിഡന്റ് കെ സുധാകരന് എം പി പുറത്താക്കിയതായി കെ പി സി സി ജനറല് സെക്രട്ടറി എം ലിജുവാണ് അറിയിച്ചത്.