ഗുജറാത്ത് കലാപത്തെക്കുറിച്ചുളള ബിബിസി ഡോക്യുമെന്ററിയുടെ ലിങ്കുകള് നീക്കം ചെയ്യാന് കേന്ദ്ര നിര്ദേശം
ഗുജറാത്ത് കലാപത്തെ കുറിച്ചുള്ള ബിബിസിയുടെ ഡോക്യുമെന്ററിയുടെ സോഷ്യല്മീഡിയ ലിങ്കുകള് നീക്കം ചെയ്യാന് കമ്പനികള്ക്ക് കേന്ദ്രസര്ക്കാര് നിര്ദേശം. കലാപത്തില് നരേന്ദ്രമോദിയുടെ പങ്ക് ആരോപിക്കുന്ന ‘ഇന്ത്യ: ദി മോദി ക്വസ്റ്റ്യന്’ ഡോക്യുമെന്ററിയുടെ ലിങ്കുകള് നീക്കം ചെയ്യാനാണ് യൂട്യൂബിനും ട്വിറ്ററിനും് കേന്ദ്രം നിര്ദേശം നല്കിയത്. യുട്യൂബ് ലിങ്കുകള് അടങ്ങിയ 50ലധികം ട്വീറ്റുകള് ബ്ലോക്ക് ചെയ്യാനും ട്വിറ്ററിനോട് കേന്ദ്രം ആവശ്യപ്പെട്ടിട്ടുണ്ട്. ഗുജറാത്ത് കലാപത്തില് നരേന്ദ്രമോദിക്ക് പങ്കുണ്ടെന്നും വംശഹത്യയില് കുറ്റവാളിയാണെന്നും ബിബിസി ഡോക്യുമെന്ററിയില് പറയുന്നുണ്ട്.
ഡോക്യുമെന്ററി രാജ്യത്ത് ബ്ലോക്ക് ചെയ്ത നടപടി ജനാധിപത്യ വിരുദ്ധമെന്ന് കോണ്ഗ്രസ് അഭിപ്രായപ്പെട്ടു. 2002ലെ ഗുജറാത്ത് കലാപത്തിന്റെ സത്യം പുറത്ത് വരുന്നതില് പ്രധാനമന്ത്രി നരേന്ദ്രമോദിക്ക് ഇപ്പോഴും ഭയമാണ്. യാഥാര്ത്ഥ്യം ലോകം കണ്ടുകൊണ്ടിരിക്കുമ്പോള് മോദി സര്ക്കാര് അത് മറച്ചുവെക്കുന്നുവെന്നതില് കാര്യമില്ലെന്നും കോണ്ഗ്രസ് അഭിപ്രായപ്പെട്ടു.