കായംകുളത്ത് താലൂക്ക് ആശുപത്രിയില് രോഗിയുടെ അതിക്രമം; രണ്ട് ജീവനക്കാര്ക്ക് കുത്തേറ്റു
കായംകുളം താലൂക്ക് ആശുപത്രിയില് രോഗിയുടെ അതിക്രമത്തെ തുടര്ന്ന് ഹോം ഗാര്ഡിനും സുരക്ഷാ ജീവനക്കാരനും കുത്തേറ്റു. നഴ്സിംഗ് റൂമിലേക്ക് അതിക്രമിച്ച് കയറി നഴ്സിനെ ഭീഷണിപ്പെടുത്തിയത് തടഞ്ഞപ്പോഴായിരുന്നു ആക്രമണം. കൃഷ്ണപുരം കാപ്പില് സ്വദേശി ദേവരാജനാണ് അക്രമി. ഇയാളെ പോലീസ് കസ്റ്റഡിയില് എടുത്തു. കീഴടക്കാന് ശ്രമിക്കുന്നതിനിടെ പോലീസുകാര്ക്കും പരുക്കേറ്റു.
കാലില് മുറിവേറ്റ് എത്തിയ ദേവരാജന് പെട്ടെന്ന് പ്രകോപിതനായി നഴ്സിംഗ് റൂമിലേക്ക് അതിക്രമിച്ച് കയറുകയായിരുന്നു. ബഹളം കേട്ട് ഓടിയെത്തിയ ഹോം ഗാര്ഡിനെ അവിടെയുണ്ടായിരുന്ന കത്രിക കൈക്കലാക്കി കുത്തി. തടയാനെത്തിയ സെക്യൂരിറ്റി ജീവനക്കാരന് മധുവിന്റെ വലത് കൈക്കും കുത്തേറ്റു.
ഹോം ഗാര്ഡ് വിക്രമന്റെ വയറ്റിലാണ് കുത്തേറ്റത്. ഇരുവരെയും ആലപ്പുഴ മെഡിക്കല് കോളജ് ആശുപത്രിയില് പ്രവേശിപ്പിച്ചു. പോലീസുകാരായ ശിവകുമാര്, ശിവന് പിള്ള എന്നിവര്ക്കും പരുക്കേറ്റു.