നിയമസഭാ തിരഞ്ഞെടുപ്പ്: സീറ്റ് വിഭജനത്തില് കോണ്ഗ്രസ്-മുസ്ലിം ലീഗ് അന്തിമ ധാരണയിലേക്ക്
നിയമസഭാ തിരഞ്ഞെടുപ്പിലെ സീറ്റ് വിഭജനത്തില് കോണ്ഗ്രസും മുസ്ലിം ലീഗും അന്തിമ ധാരണയിലേക്കെത്തുന്നു. നിലവിലെ ധാരണ പ്രകാരം മുസ്ലിം ലീഗിന് 27 സീറ്റുകള് ലഭിക്കും. ഇതിന്റെ ഭാഗമായി തിരുവമ്പാടി സീറ്റ് ഒഴിയാന് ലീഗ് സന്നദ്ധത പ്രകടിപ്പിച്ചിട്ടുണ്ട്. ലീഗ് ഇതുവരെ മത്സരിച്ചിരുന്ന കോങ്ങാട് സീറ്റ് കോണ്ഗ്രസ് ഏറ്റെടുക്കും. കോങ്ങാടിന് പകരമായി മറ്റൊരു സംവരണ മണ്ഡലം ലീഗിന് കൈമാറാനാണ് തീരുമാനം.
അതേസമയം, കളമശ്ശേരി സീറ്റ് വിട്ടുകൊടുക്കില്ലെന്ന നിലപാടിലാണ് കോണ്ഗ്രസ്. കളമശ്ശേരിയുടെ കാര്യത്തില് കൂടുതല് ചര്ച്ചകള് തുടരാനാണ് പാര്ട്ടി തീരുമാനം.
ഇതിനിടെ കോണ്ഗ്രസ് സ്ഥാനാര്ത്ഥി നിര്ണയ ചര്ച്ചകള്ക്ക് നേതൃത്വം നല്കുന്നതിനായി സ്ക്രീനിങ് കമ്മിറ്റി ചെയര്മാന് മധുസൂദനന് മിസ്ത്രി തിരുവനന്തപുരത്തെത്തി. ഇന്നും നാളെയും കേരളത്തില് തുടരുമെന്ന് അറിയിച്ച മിസ്ത്രി, പ്രധാനപ്പെട്ട നേതാക്കളുമായി കൂടിക്കാഴ്ച നടത്തും. നേതാക്കളില് നിന്നുള്ള അഭിപ്രായങ്ങള് വിലയിരുത്തിയ ശേഷമായിരിക്കും സാധ്യതാ പട്ടിക തയ്യാറാക്കുക.
വിജയസാധ്യത പ്രധാന മാനദണ്ഡമാക്കിയാവും ഇത്തവണ സ്ഥാനാര്ത്ഥി നിര്ണയം. ഇതോടൊപ്പം, സര്വ്വേ ഫലങ്ങളും സ്ഥാനാര്ത്ഥി തിരഞ്ഞെടുപ്പില് പരിഗണിക്കുമെന്ന് കോണ്ഗ്രസ് നേതൃത്വം അറിയിച്ചു.