നാളെ നിശ്ചയിച്ചിരുന്ന പിഎസ്‌സി പരീക്ഷകള്‍ മാറ്റിവച്ചു; അഭിമുഖങ്ങള്‍ക്ക് മാറ്റമില്ല
തിരുവനന്തപുരം: 2025 ജൂലൈ 23 ബുധനാഴ്ച നടക്കേണ്ടിയിരുന്ന വിവിധ പിഎസ്‌സി പരീക്ഷകള്‍ മാറ്റിവച്ചതായി കേരള പബ്ലിക് സര്‍വീസ് കമ്മീഷന്‍ അറിയിച്ചു. പരീക്ഷകള്‍ ഏതു പുതിയ തീയതിയിലേക്ക് മാറ്റിയെന്നത് പിന്നീട് അറിയിക്കുമെന്നാണ് അറിയിപ്പ്.
പൊതുമരാമത്ത്, ജലസേചന വകുപ്പുകളിലെ സെക്കന്റ് ഗ്രേഡ് ഓവര്‍സിയര്‍/ഡ്രാഫ്റ്റ്‌സ്മാന്‍ (സിവില്‍) തസ്തികയിലേക്കുള്ള നേരിട്ടുള്ള നിയമനം (കാറ്റഗറി നമ്പര്‍ 8/2024), ജലസേചന വകുപ്പിലെ പട്ടിക വര്‍ഗ്ഗാര്‍ക്ക് വേണ്ടി മാറ്റിവച്ചിരിക്കുന്ന സെക്കന്റ് ഗ്രേഡ് ഓവര്‍സിയര്‍/ഡ്രാഫ്റ്റ്‌സ്മാന്‍ (സിവില്‍) തസ്തിക (കാറ്റഗറി നമ്പര്‍ 293/2024), കേരള സംസ്ഥാന പട്ടിക ജാതി/ പട്ടിക വര്‍ഗ്ഗ വികസന കോര്‍പ്പറേഷനിലെ ട്രേസര്‍ തസ്തിക (കാറ്റഗറി നമ്പര്‍ 736/2024) എന്നിവയ്ക്കായുള്ള പരീക്ഷകളാണ് മാറ്റിയിരിക്കുന്നത്.
അതേസമയം, നാളെ നിശ്ചയിച്ചിട്ടുള്ള പിഎസ്‌സി അഭിമുഖങ്ങള്‍ നേരത്തേ നിശ്ചിച്ചതു പോലെ തന്നെ നടത്തുമെന്ന് കമ്മീഷന്‍ വ്യക്തമാക്കി.