അന്തരിച്ച പിപി മാധവന് ആദരാഞ്ജലിയർപ്പിക്കാൻ ഓടിയെത്തി രാഹുൽ ഗാന്ധി
അന്തരിച്ച പിപി മാധവന് ആദരാഞ്ജലിയർപ്പിക്കാൻ ഓടിയെത്തി രാഹുൽ ഗാന്ധി. ലോക്സഭയിൽ ഒരു രാജ്യം ഒരു തിരഞ്ഞെടുപ്പ് ബില്ല് അവതരണം ഉൾപ്പെടെ നിർണ്ണായക ദിവസമായിട്ടും തൻ്റെ പ്രിയ മാധവ് അങ്കിളിന് അന്ത്യോപചാരമർപ്പിക്കാൻ രാഹുലെത്തി. 45 വർഷം കോൺഗ്രസ് പാർലമെൻ്ററി പാർട്ടി അധ്യക്ഷ സോണിയ ഗാന്ധിയുടെ പേഴ്സനൽ സെക്രട്ടറി പി.പി. മാധവന്റെ അന്ത്യോപചാര ചടങ്ങുകളിലാണ് ലോക്സഭാ പ്രതിപക്ഷ നേതാവ് രാഹുൽ ഗാന്ധി സജീവ സാന്നിധ്യമായത്.
ഹൃദയാഘാതത്തെത്തുടർന്നു തിങ്കളാഴ്ച ഡൽഹിയിലായിരുന്നു മാധവന്റെ അന്ത്യം. അന്നേ ദിവസം തന്നെ സോണിയ ഗാന്ധിയും പ്രിയങ്ക ഗാന്ധിയും അപ്പോൾത്തന്നെ ഡൽഹിയിലെ വസതിയിലെത്തി അന്ത്യോപചാരമർപ്പിച്ചിരുന്നു. പുനെയിലായിരുന്ന രാഹുൽ ഗാന്ധി തിങ്കളാഴ്ച രാത്രി പത്തരയോടെ തൃശൂരിലെത്തി. പിന്നീട് ഇന്നലെ രാവിലെ 9.20ന് ആണു തൈക്കാട്ടുശേരി ചെറുശേരി പട്ടത്തു മനയിലെത്തിയത്. അന്ത്യോപചാരമർപ്പിച്ച ശേഷം സോണിയ ഗാന്ധി, പ്രിയങ്ക ഗാന്ധി എംപി, എഐസിസി അധ്യക്ഷൻ മല്ലികാർജുൻ ഖർഗെ എന്നിവർക്കു വേണ്ടി അദ്ദേഹം പുഷ്പചക്രം അർപ്പിച്ചു. വെള്ളപ്പൂക്കൾനിറഞ്ഞ റീത്ത് സമർപ്പിച്ച് കൂപ്പുകൈകളോടെ അദ്ദേഹം നിന്നു, തന്റെ കുടുംബത്തിനായി ജീവിതം ഉഴിഞ്ഞുവെച്ച മനുഷ്യന്റെ ചേതനയറ്റ ശരീരത്തിനുമുന്നിൽ.
അദ്ദേഹത്തിൻ്റെ വിയോഗം പാർട്ടിക്ക് വലിയ നഷ്ടമാണെന്ന് കെസി വേണുഗോപാൽ പറഞ്ഞു. “നാല് പതിറ്റാണ്ടിലേറെയായി അദ്ദേഹം ഞങ്ങളുടെ പാർട്ടി നേതൃത്വത്തോടൊപ്പമുണ്ടായിരുന്നു, ശക്തമായ കോൺഗ്രസ് ഘടകങ്ങളെ അദ്ദേഹം മനസ്സിൽ കൊണ്ടുനടന്നു. പാർട്ടിക്കും കുടുംബത്തിനും ഇത് വലിയ നഷ്ടമാണ്.” പെട്ടെന്നാണ് ഇത് സംഭവിച്ചതെന്നും കെ സി വേണുഗോപാൽ എഎൻഐയോട് പറഞ്ഞു.
ആദരമർപ്പിച്ചശേഷം മാധവന്റെ ഭാര്യ സാവിത്രി, മക്കളായ ദീപക്, ദീപ്തി, മരുമക്കളായ അശ്വതി, വരുൺ അടക്കമുള്ളവരെ ആശ്വസിപ്പിച്ചാണു രാഹുൽ മടങ്ങിയത്. പ്രത്യേക വിമാനത്തിൽ നാട്ടിലെത്തിച്ച മൃതദേഹം ഇന്നലെ 11ന് തൈക്കാട്ടുശേരിയിലെ വീട്ടുവളപ്പിൽ സംസ്കരിച്ചു.
കെ.സി. വേണുഗോപാൽ എം.പി., പ്രതിപക്ഷ നേതാവ് വി.ഡി. സതീശൻ, രമേശ് ചെന്നിത്തല, വി.എം. സുധീരൻ തുടങ്ങിയവരും രാഹുലിനൊപ്പം ആദരാഞ്ജലികളർപ്പിച്ചു. മന്ത്രി കെ. രാജൻ, കെ.പി.സി.സി. പ്രസിഡന്റ് കെ. സുധാകരൻ, എം.എൽ.എ.മാരായ കെ.കെ. രാമചന്ദ്രൻ, റോജി എം. ജോൺ, സനീഷ് കുമാർ ജോസഫ്, ആർച്ച് ബിഷപ്പ് ആൻഡ്രൂസ് താഴത്ത്, കൈതപ്രം ദാമോദരൻ നമ്പൂതിരി തുടങ്ങിയവരും അന്ത്യോപചാരമർപ്പിച്ചു.