ചാലക്കുടി പുഴയുടെ തീരത്തുള്ളവർ സംരക്ഷിത സ്ഥലങ്ങളിലേക്ക് മാറണം; മന്ത്രി കെ. രാജൻ
ചാലക്കുടി പുഴയുടെ തീരത്തുള്ളവരെ സുരക്ഷിതമായി മാറ്റിപ്പാര്പ്പിക്കാന് തയാറെടുപ്പുകള് ആരംഭിച്ചിട്ടുണ്ട്. തീരപ്രദേശത്തുള്ളവരുടെ വിലകൂടിയ രേഖകള് സീല്ചെയ്തു മാറ്റും. മൃഗസംരക്ഷണ വകുപ്പ് ഇടപെട്ട് ഫാമുകളിലുള്ള മൃഗങ്ങളെയടക്കം മാറ്റി താമസിപ്പക്കാനുള്ള സൗകര്യം ഒരുക്കും. ഒഴിപ്പിക്കല് നടപടികള്ക്ക് ആവശ്യമെങ്കില് മത്സ്യത്തൊഴിലാളികളുടെ ബോട്ട് തയാറാക്കിനിര്ത്തും. വ്യോമ, നാവിക സേനകള് തയാറായി നില്ക്കുന്നുണ്ട്. ദേശീയ ദുരന്ത നിവാരണ സേനയും ഉണ്ട്. ജില്ലാ ഭരണകൂടവും തദ്ദേശ സ്വയംഭരണ സ്ഥാപനങ്ങളും നല്കുന്ന നിര്ദേശങ്ങള് കര്ശനമായി പാലിക്കണം. അനാവശ്യമായി അറിവില്ലാത്ത കാര്യങ്ങള് സമൂഹ മാധ്യമങ്ങളില് പ്രചരിപ്പിക്കരുത്. ഇതിനെതിരേ കര്ശന നടപടിയെടുക്കും.
ചാലക്കുടിപ്പുഴയില് ജലനിരപ്പ് ഉയരുന്ന സാഹചര്യത്തില് എറണാകുളം ജില്ലയില് ചാലക്കുടിപ്പുഴയുടെ തീരം ഉള്ക്കൊള്ളുന്ന പുത്തന്വേലിക്കര, കുന്നുകര, ചേന്ദമംഗലം, പാറക്കടവ് പഞ്ചായത്തുകളില് ജാഗ്രതാ നിര്ദേശം നല്കിയിട്ടുണ്ട്. താഴ്ന്ന പ്രദേശങ്ങളില് താമസിക്കുന്നവര് അധികൃതരുടെ നിര്ദേശപ്രകാരം ക്യാമ്പുകളിലേക്കോ സുരക്ഷിത സ്ഥാനങ്ങളിലേക്കോ മാറണം. എറണാകുളം ഡെപ്യൂട്ടി കളക്ടര് (ദുരന്ത നിവാരണം), തഹസില്ദാര് എന്നിവര് സ്ഥലത്ത് ക്യാമ്പ് ചെയ്യുന്നുണ്ട്. ദേശീയ ദുരന്ത പ്രതികരണ സേന (എന്.ഡി.ആര്.എഫ്) സാന്നിധ്യവും ഈ മേഖലയിലുണ്ട്