കപ്പല് സര്വീസുകള് വെട്ടിക്കുറച്ച നടപടി; ലക്ഷദ്വീപില് അവശ്യസാധനങ്ങള്ക്ക് ക്ഷാമം
ലക്ഷദ്വീപ് തലസ്ഥാനമായ കവരത്തി ഉള്പ്പെടെയുള്ള പ്രധാന ദ്വീപുകകളില് അവശ്യസാധനങ്ങള്ക്ക് ക്ഷാമം രൂക്ഷമാകുന്നുവെന്ന് റിപ്പോര്ട്ടുകള്. നിലവില് കടകളില് ഗോതമ്പ്, പയര് വര്ഗ്ഗങ്ങള്, പഞ്ചസാര തുടങ്ങിയ സാധനങ്ങള് ലഭ്യമല്ലാത്ത അവസ്ഥയാണ്. കടകളിലെ ഷെല്ഫുകള് ഒഴിഞ്ഞുകിടക്കുന്ന കാഴ്ച ദ്വീപിലെ സാധാരണക്കാര്ക്കിടയില് വലിയ രീതിയില് ആശങ്കയുണ്ടാക്കിയിരിക്കുകയാണ്.
ലക്ഷദ്വീപിലേക്ക് സാധനങ്ങള് എത്തിച്ചിരുന്ന കപ്പലുകളുടെയും ബാര്ജുകളുടെയും എണ്ണം ലക്ഷദ്വീപ് അഡ്മിനിസ്ട്രേഷന് വെട്ടിക്കുറച്ചതാണ് ഈ ക്ഷാമത്തിന് പ്രധാന കാരണം. അവശ്യവസ്തുക്കള് കൃത്യമായി എത്തിക്കാന് കഴിയാതെ വന്നതോടെയാണ് കടകളില് സാധനങ്ങളുടെ ലഭ്യത കുറഞ്ഞത്. ഈ നടപടി ദ്വീപ് നിവാസികളുടെ ദൈനംദിന ജീവിതത്തെ സാരമായി ബാധിച്ചിരിക്കുകയാണ്.
ഈ പ്രതിസന്ധിക്ക് പിന്നില് രാഷ്ട്രീയപരമായ കാരണങ്ങളുണ്ടെന്ന് ദ്വീപ് നിവാസികള്ക്കിടയില് ആരോപണമുയരുന്നുണ്ട്. മിത്ര ദ്വീപിനെ ഏറ്റെടുക്കാനുള്ള ലക്ഷദ്വീപ് അഡ്മിനിസ്ട്രേഷന്റെ തീരുമാനത്തിന് പിന്നാലെയാണ് ഈ സാഹചര്യം ഉടലെടുത്തതെന്നത് സംശയം വര്ദ്ധിപ്പിക്കുന്നു. ദ്വീപ് നിവാസികളുടെ സ്വസ്ഥമായ ജീവിതം മനപ്പൂര്വ്വം തടസ്സപ്പെടുത്താന് അഡ്മിനിസ്ട്രേഷന് ശ്രമിക്കുകയാണോയെന്നും ആളുകള് ഭയപ്പെടുന്നുണ്ട്.
അതേസമയം റേഷന് കടകളിലൂടെയുള്ള സാധനങ്ങള് ഇപ്പോഴും കൃത്യമായി ലഭിക്കുന്നുണ്ടെന്ന് ചിലര് പറയുന്നുണ്ടെങ്കിലും, സ്വകാര്യ കടകളിലെ ക്ഷാമം സാധാരണക്കാരെ വലിയ ബുദ്ധിമുട്ടിലാക്കിയിരിക്കുകയാണ്. ദ്വീപ് നിവാസികളുടെ ആശങ്കകള്ക്ക് പരിഹാരം കാണേണ്ടത് അടിയന്തര ആവശ്യമായി മാറിയിരിക്കുകയാണ്.