ഗര്ഭഛിദ്രം സ്ത്രീകളുടെ നിയമപരമായ അവകാശം, ഭര്ത്താവടക്കം അതില് ഇടപെടാന് ആര്ക്കും അവകാശമില്ല ; അവിവാഹിതരായ സ്ത്രീകള്ക്കും ഗര്ഭഛിദ്രത്തിന് അവകാശം; സുപ്രധാനമായ വിധിയുമായി സുപ്രീംകോടതി
ഡല്ഹി: ഗര്ഭഛിദ്രം സ്ത്രീകളുടെ അവകാശമാണെന്ന് സുപ്രീംകോടതി. ജസ്റ്റിസ് ഡി.വൈ ചന്ദ്രചൂഡിന്റെതാണ് നിര്ണായക ഉത്തരവ്. ഗര്ഭച്ഛിദ്രവുമായി ബന്ധപ്പെട്ട വിഷയത്തില് ഭര്ത്താവിന്റെ ലൈംഗിക പീഡനവും ബലാത്സംഗമായി കണക്കാക്കാം.
24 ആഴ്ചയ്ക്ക് താഴെ പ്രായമുള്ള ഗര്ഭം ഒഴിവാക്കുന്നതിന് വിവാഹിതരായ സ്ത്രീകള്ക്കും അവിവാഹിത സ്ത്രീകള്ക്കും ഒരേ പോലെ അവകാശമുണ്ടെന്നാണ് സുപ്രീംകോടതി വ്യക്തമാക്കിയിരിക്കുന്നത്. ഗര്ഭം ധരിക്കണോ വേണ്ടെയോ എന്നത് ഒരു സ്ത്രീയുടെ അവകാശമാണെന്നാണ് കോടതി വ്യക്തമാക്കിയിരിക്കുന്നത്. ഗര്ഭഛിദ്രം സ്വന്തം നിലക്ക് തന്നെ സ്ത്രീകള്ക്ക് തീരുമാനിക്കാം. ഭര്ത്താവ് അടക്കം ആര്ക്കും അതില് ഇടപെടാന് അവകാശമില്ലെന്ന് കോടതി വ്യക്തമാക്കി.
സമ്മതമില്ലാതെ ഭര്ത്താവ് നടത്തുന്ന ലൈംഗിക ബന്ധവും ബലാത്സംഗമാണെന്നും കോടതി ചൂണ്ടിക്കാട്ടി. അവിവാഹിതരായ സ്ത്രീകള്ക്ക് മെഡിക്കല് ടെര്മിനേഷന് ഓഫ് പ്രെഗ്നന്സി ആക്ട് പ്രകാരം ഗര്ഭഛിദ്രത്തിന് അവകാശമുണ്ടെന്നും കോടതി വിധിച്ചു.
വിവാഹിതരായ സ്ത്രീകള്ക്ക് ഗര്ഭഛിദ്രം നടത്താന് ഭര്ത്താവിന്റെ അനുമതി ആവശ്യമില്ലെന്ന് നേരത്തെ കേരള ഹൈക്കോടതിയും വിധിച്ചിരുന്നു. ഭര്ത്താവിന്റെ പീഡനം കാരണം ഭര്തൃഗൃഹം വിട്ട കോട്ടയം സ്വദേശിയായ 26കാരിയായ യുവതിക്ക് ഗര്ഭഛിദ്രം നടത്താന് അനുമതി നല്കിക്കൊണ്ട് ജസ്റ്റിസ് വി.ജി. അരുണ് പുറപ്പെടുവിച്ച ഉത്തരവിലാണ് ഇക്കാര്യം വ്യക്തമാക്കിയത്.