എസ്പിജി തലവന് അരുണ് കുമാര് സിന്ഹ അന്തരിച്ചു
സ്പെഷല് പ്രൊട്ടക്ഷന് ഗ്രൂപ്പ് (എസ്പിജി) തലവന് അരുണ് കുമാര് സിന്ഹ (61) അന്തരിച്ചു. ഇന്ന് പുലര്ച്ചെയാണു അന്ത്യം. കാന്സര് ബാധിതനായിരുന്നു. 2016 മുതല് എസ്പിജി ഡയറക്ടറാണ്. പ്രധാനമന്ത്രിയുടെ സുരക്ഷാ വിഭാഗത്തിന്റെ ചുമതല വഹിച്ചിരുന്ന കേരള കേഡര് ഐപിഎസ് ഉദ്യോഗസ്ഥനാണ് അരുണ് കുമാര് സിന്ഹ. 1987 ബാച്ച് കേരള കേഡര് ഉദ്യോഗസ്ഥനാണ്.
ജാര്ഖണ്ഡിലാണു വിദ്യാഭ്യാസം പൂര്ത്തിയാക്കിയത്. തിരുവനന്തപുരത്തു ഡിസിപി കമ്മിഷണര്, റേഞ്ച് ഐജി, ഇന്റലിജന്സ് ഐജി, അഡ്മിനിസ്ട്രേഷന് ഐജി എന്നിങ്ങനെ കേരള പൊലീസിലെ പ്രധാന കസേരകളിലെല്ലാം അരുണ് കുമാര് സിന്ഹ ഇരുന്നിട്ടുണ്ട്. അരുണ് കുമാര് സിന്ഹ ക്രമസമാധന ചുമതല വഹിച്ചിരുന്ന കാലത്താണു മാലിദ്വീപ് പ്രസിഡന്റായിരുന്ന അബ്ദുല് ഗയൂമിനെ വധിക്കാന് ശ്രമിച്ച മുഖ്യ സൂത്രധാരനെ തലസ്ഥാനത്തു നിന്നു പിടികൂടിയത്.
പ്രധാനമന്ത്രിക്കും രാഷ്ട്രപതിക്കും എതിരെ നടന്ന ഇമെയില് വധഭീഷണി, ലെറ്റര് ബോംബ് കേസ് എന്നിങ്ങനെ സുപ്രധാന കേസുകള് തെളിയിക്കുന്നതില് നിര്ണായക പങ്കു വഹിച്ചു. സിന്ഹ സിറ്റി പൊലീസ് കമ്മിഷണറായിരിക്കെയാണു നഗരത്തില് ക്രൈം സ്റ്റോപ്പര് സംവിധാനം കൊണ്ടുവന്നത്. സ്തുത്യര്ഹ സേവനത്തിനുള്ള രാഷ്ട്രപതിയുടെ മെഡലും സിന്ഹയ്ക്കു ലഭിച്ചിട്ടുണ്ട്.