വണ്ടാനം മെഡിക്കല് കോളേജ് ശസ്ത്രക്രിയ പിഴവ്: ഡോ. ലളിതാംബികയുടെ പ്രതികരണത്തില് മന്ത്രി വീണാ ജോര്ജിന് അതൃപ്തി
ആലപ്പുഴ വണ്ടാനം മെഡിക്കല് കോളേജില് രോഗിയുടെ വയറ്റില് ശസ്ത്രക്രിയയ്ക്കിടെ കത്രിക കുടുങ്ങിയ ഗുരുതര ചികിത്സാപിഴവ് സംഭവത്തില് അന്നത്തെ ഗൈനക്കോളജി വിഭാഗം മേധാവിയായിരുന്ന ഡോ. ലളിതാംബിക നടത്തിയ പ്രതികരണത്തില് ആരോഗ്യ മന്ത്രി വീണാ ജോര്ജ് ശക്തമായ അതൃപ്തി രേഖപ്പെടുത്തി. ഉത്തരവാദിത്വത്തില് നിന്ന് ഒഴിഞ്ഞും വ്യവസ്ഥിതിയെ കുറ്റപ്പെടുത്തിയും നടത്തിയ പ്രസ്താവന അംഗീകരിക്കാനാവാത്തതാണെന്ന് മന്ത്രി പറഞ്ഞു. സംഭവത്തില് നിയമപരമായ എല്ലാ നടപടികളും സ്വീകരിക്കുമെന്ന് അവര് വ്യക്തമാക്കി.
ഡിഎംഇക്ക് ലഭിച്ച പ്രാഥമിക അന്വേഷണ റിപ്പോര്ട്ടിന്റെ അടിസ്ഥാനത്തില് വിദഗ്ധ സമിതി രൂപീകരിച്ച് വിശദമായ അന്വേഷണം നടത്തും. സംഘം ആലപ്പുഴയിലെത്തി തെളിവുകള് ശേഖരിക്കും. റിപ്പോര്ട്ട് പൊലീസിന് കൈമാറും. ഈ വിഷയത്തില് യാതൊരു തരത്തിലുള്ള ദാക്ഷിണ്യവും കാണിക്കില്ല. സര്വീസിലുള്ളവരെ അന്വേഷണ വിധേയമായി സസ്പെന്ഡ് ചെയ്യുമെന്നും മന്ത്രി അറിയിച്ചു.
കത്രിക വയറ്റില് കുടുങ്ങിയ നിലയില് അഞ്ചുവര്ഷത്തോളം ദുരിതം അനുഭവിച്ച രോഗിയായ ഉഷയുടെ മകനുമായി മന്ത്രി സംസാരിച്ചു. മെഡിക്കല് കോളേജിലെ ഡോക്ടറെ വീട്ടില് ചെന്നു കണ്ടതായി മകന് പറഞ്ഞുവെന്നും, കേസിനെക്കുറിച്ച് ഡോക്ടര്ക്ക് ഓര്മ്മയുണ്ടായിരുന്നുവെന്നും മന്ത്രി വ്യക്തമാക്കി. ശസ്ത്രക്രിയ താനല്ല നടത്തിയതെന്നാണ് ഡോക്ടര് പറയുന്നതെന്നും, അതെങ്ങനെ സാധ്യമാകുമെന്ന് മന്ത്രി ചോദിച്ചു.
ശസ്ത്രക്രിയ പ്രോട്ടോക്കോള് കര്ശനമായി പാലിച്ചാകണം ചികിത്സ നടത്തേണ്ടതെന്ന് ചൂണ്ടിക്കാട്ടിയ മന്ത്രി, കുടുംബം പറയുന്ന കാര്യങ്ങള് വിശ്വാസത്തിലെടുക്കുകയാണെന്നും പറഞ്ഞു. കത്രിക വയറ്റില് ഇരുന്നാല് കുഴപ്പമില്ല എന്ന തരത്തിലുള്ള പ്രസ്താവന ഒരു കാരണവശാലും അംഗീകരിക്കാനാകില്ലെന്നും, സ്വന്തം അനുഭവത്തില് ഇത്തരമൊരു സംഭവം വന്നാല് ഡോക്ടര് ഇങ്ങനെ പറയുംോയെന്ന് മന്ത്രി ചോദിച്ചു. ഡോക്ടറുടെ ഭാഗത്ത് നിന്നുണ്ടായത് സ്വന്തം ജോലിയോടുള്ള അനാദരവാണെന്നും അവര് കൂട്ടിച്ചേര്ത്തു.