വിഴിഞ്ഞം ബൈപ്പാസില് മത്സരയോട്ടത്തിനിടെ ബൈക്കുകള് തമ്മില് കൂട്ടിയിടിച്ചുണ്ടായ അപകടത്തില് 18 വയസ്സുള്ള രണ്ട് കുട്ടികൾ മരിച്ചു
തിരുവനന്തപുരം: വിഴിഞ്ഞം ബൈപ്പാസില് മത്സരയോട്ടത്തിനിടെ ബൈക്കുകള് തമ്മില് കൂട്ടിയിടിച്ചുണ്ടായ അപകടത്തില് രണ്ട് കുട്ടികൾ മരിച്ചു. ചൊവ്വര സ്വദേശി ശരത് (18) വട്ടിയൂര്ക്കാവ് നെട്ടയം സ്വദേശി മുഹമ്മദ് ഫിറോസ് ( 18 )എന്നിവരാണ് മരിച്ചത്. അപകടമുണ്ടായ ഉടന് ഇവരെ ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല. വിഴിഞ്ഞം കല്ലുവെട്ടാംകുഴിക്ക് സമീപമാണ് അപകടം.
ഏതാണ്ട് അഞ്ചേകാലോടെയാണ് വിഴിഞ്ഞം ബൈപ്പാസില് അപകടമുണ്ടാകുന്നത്. ബൈക്ക് റേസിംഗ് തന്നെയാണ് അപകടമുണ്ടാകാന് കാരണമെന്ന് വിഴിഞ്ഞം സിഐ സ്ഥിരീകരിച്ചു. അപകടമുണ്ടായ ഉടന് തന്നെ ഇരുവരെയും തിരുവനന്തപുരം മെഡിക്കല് കോളേജ് ആശുപത്രിയിലെത്തിച്ചിരുന്നു. കൊണ്ടുപോകുമ്ബോള്ത്തന്നെ ഇരുവരുടെയും നില അതീവഗുരുതരമായിരുന്നുവെന്ന് പൊലീസ് അറിയിച്ചു.
വിഴിഞ്ഞം ബൈപ്പാസ് മേഖലയില് ബൈക്ക് റേസിംഗ് സ്ഥിരമായി നടക്കാറുണ്ട്. ഇതിനെതിരെ പൊലീസില് സ്ഥിരം പരാതി എത്താറുണ്ടെന്നും, ഇന്ന് രാവിലെക്കൂടി നാല് വാഹനങ്ങള് അമിതവേഗതയെത്തുടര്ന്ന് പിടിച്ചെടുത്തിരുന്നുവെന്നും വിഴിഞ്ഞം സിഐ പറയുന്നു