സജി ചെറിയാന് വീണ്ടും മന്ത്രി സഭയിലേക്ക് ?
വിവാദ പ്രസംഗത്തിന്റെ പേരില് പുറത്തുപോകേണ്ടി വന്ന സജി ചെറിയാനെ മന്ത്രിസഭയിലേക്ക് വീണ്ടും തിരിച്ചെത്തിക്കുന്നതിന് നടപടികളുമായി സിപിഎം . ഇന്ന് ചേരുന്ന സിപിഎം സംസ്ഥാന സെക്രട്ടറിയേറ്റ് യോഗം ഇക്കാര്യം ചര്ച്ച ചെയ്യും. ഭരണഘടനയെ അവഹേളിച്ചെന്ന കേസില് സജി ചെറിയാന് ക്ലീന് ചിറ്റ് നല്കി കഴിഞ്ഞ ദിവസം അന്വേഷണ സംഘം കോടതിയില് റിപ്പോര്ട്ട് നല്കിയതിന് പിന്നാലെയാണ് സിപിഎം നീക്കം.സജി ചെറിയാനെ എംഎല്എ സ്ഥാനത്ത് നിന്നും അയോഗ്യനാക്കണമെന്ന് ആവശ്യപ്പെട്ടുള്ള ഹരജി കഴിഞ്ഞ ദിവസം ഹൈക്കോടതിയും തള്ളിയിരുന്നു.
2022 ജൂലൈ 3 ന് പത്തനംതിട്ട മല്ലപ്പള്ളിയിലെ വിവാദ പ്രസംഗത്തിന്റെ പേരിലാണ് ജൂലൈ ആറിന് സജി ചെറിയാന് രാജിവെച്ചത്. സജിക്ക് പകരം പുതിയ മന്ത്രിയെ ഉള്പ്പെടുത്തിയിരുന്നില്ല. വകുപ്പുകള് മറ്റ് മന്ത്രിമാര്ക്ക് നല്കി കേസ് തീരാന് കാത്തിരിക്കുകയായിരുന്നു സിപിഎം.