ലക്ഷ്യം കാണുന്നതുവരെ ഇറാനെതിരായ ആക്രമണം തുടരുമെന്ന് ട്രംപ്
സമവായ ചര്ച്ചകള് സാധ്യമെന്ന പ്രതീക്ഷകള്ക്കിടയിലും ഇറാനെതിരെ നിലപാട് കടുപ്പിച്ച് അമേരിക്കന് പ്രസിഡന്റ് ഡോണള്ഡ് ട്രംപ്. ആയുധം താഴെവെച്ചില്ലെങ്കില് മരണമെന്ന് ഇറാന് സൈന്യത്തിനും റെവല്യൂഷണറി ഗാര്ഡിനും ട്രംപ് മുന്നറിയിപ്പ് നല്കി. ലക്ഷ്യം കാണുന്നതുവരെ ഇറാനെതിരായ ആക്രമണം തുടരുമെന്നും ട്രംപ് പറഞ്ഞു. ആക്രമണം ആഴ്ചകളോളം നീണ്ട് പോയേക്കാമെന്ന് ട്രംപ് ഇന്ന് ഒരു അമേരിക്കന് മാധ്യമത്തിന് അനുവദിച്ച പ്രതികരണത്തില് സൂചിപ്പിച്ചു. ഇറാന് ഒരു വലിയ രാജ്യമാണെന്നും സൈനിക നടപടികള് തീര്ക്കാന് സമയമെടുത്തേക്കുമെന്നും സംഘര്ഷം നാലാഴ്ച നീണ്ടേക്കാമെന്നുമാണ് ട്രംപ് പ്രതികരിച്ചിരിക്കുന്നത്.
താന് ഇറാനുമായി സംസാരിക്കാന് തയ്യാറാണെന്ന് ട്രംപ് അറിയിച്ചെങ്കിലും ചര്ച്ചകള് എപ്പോള് നടക്കുമെന്ന് ട്രംപ് സൂചിപ്പിച്ചിട്ടില്ല. താനുമായി ചര്ച്ച നടത്താന് ഇറാന് ആഗ്രഹിക്കുന്നതായും ട്രംപ് അവകാശപ്പെട്ടു. ഇറാന് സംസാരിക്കേണ്ടിയിരുന്നത് കഴിഞ്ഞ ആഴ്ചയായിരുന്നുവെന്നും ഈ ആഴ്ചയല്ലെന്നും താന് അവരോട് പറഞ്ഞതായും ട്രംപ് പറഞ്ഞു.
അതേസമയം ഇന്നും സംഘര്ഷം രൂക്ഷമായി തുടരുകയാണ്. ഗള്ഫ് രാജ്യങ്ങള് അശാന്തമാണ്. സംഘര്ഷത്തില് ഐക്യരാഷ്ട്രസഭയുടെ അടിയന്തര ഇടപെടല് ഇറാന് ആവശ്യപ്പെട്ടിട്ടുണ്ട്. സുസ്ഥിരവും ഫലപ്രദവുമായ ഇടപെടല് വേണമെന്ന് ഇറാന് വിദേശകാര്യമന്ത്രി അബ്ബാസ് അരഘ്ചി ആവശ്യപ്പെട്ടു. ഇറാന്റെ ബഹ്റൈന് ആക്രമണത്തില് ഒരുമരണം റിപ്പോര്ട്ട് ചെയ്യപ്പെട്ടിട്ടുണ്ട്. മനാമയിലെ സല്മാല് തുറമുഖത്തിന് സമീപം മിസൈല് അവശിഷ്ടങ്ങള് വീണുണ്ടായ തീപിടിത്തത്തില് കൊല്ലപ്പെട്ടത് ഏഷ്യന് വംശജനാണ്. രണ്ട് പേര്ക്ക് ഗുരുതര പരുക്കേറ്റു. സൈപ്രസിലെ ബ്രിട്ടീഷ് സേനാ ആസ്ഥാനത്തേക്ക് ഡ്രോണ് ആക്രമണം നടത്തി ഇറാന് തയ്യാറെടുക്കുന്നുവെന്നാണ് റിപ്പോര്ട്ടുകള്.