ഓഗസ്റ്റ് 14 വിഭജന ഭീകരതാ ദിനമായി ആചരിക്കണം; ഗവര്ണര്
തിരുവനന്തപുരം: വിവാദ സര്ക്കുലറുമായി ഗവര്ണര് രാജേന്ദ്ര അര്ലേക്കര്. ഓഗസ്റ്റ് 14 വിഭജന ഭീകരതാ ദിനമായി ആചരിക്കണമെന്നാണ് സര്ക്കുലറില് പറയുന്നത്. സര്വകലാശാലകള്ക്ക് ഔദ്യോഗികമായി രാജ്ഭവന് നിര്ദേശം നല്കി. സെമിനാറുകളും നാടകങ്ങളും സംഘടിപ്പിക്കാന് വിസിമാര് പ്രത്യേക ആക്ഷന് പ്ലാന് തയാറാക്കണം. എല്ലാ വൈസ് ചാന്സലര്മാറും വിദ്യാര്ത്ഥികളും ദിനാചരണത്തില് പങ്കെടുക്കണമെന്നും സര്ക്കുലറില് നിര്ദേശിച്ചിട്ടുണ്ട്.
അതേസമയം, ഗവര്ണര് സമാന്തര ഭരണ സംവിധാനമായി പ്രവര്ത്തിക്കാന് ശ്രമിക്കുകയാണെന്ന് മന്ത്രി വി ശിവന്കുട്ടി ആരോപിച്ചു. ദിനാചാരണം നടത്താന് നിര്ദേശിക്കാന് ഗവര്ണര്ക്ക് അധികാരമില്ലെന്നും അദ്ദേഹം കൂട്ടിച്ചേര്ത്തു.
കഴിഞ്ഞവര്ഷം യുജിസിയും സമാന നിര്ദേശം നല്കിയിരുന്നു. സര്വകലാശാലകളില് വിഭജന ഭീതി ദിനം ആചരിക്കണമെന്നായിരുന്നു നിര്ദേശം. ഓഗസ്റ്റ് പതിനാല് വിഭജന ഭീകരത സ്മരണദിനമായി ആചരിക്കുമെന്ന് പ്രധാനമന്ത്രി നരേന്ദ്ര മോദി മന് കി ബാത്തില് സംസാരിക്കവെ പറഞ്ഞിരുന്നു.