തിരുവനന്തപുരം: സംസ്ഥാനം അനുഭവിക്കുന്ന ഗുരുതരമായ സാമ്പത്തിക പ്രതിസന്ധി നേരിടുന്നതിന് വായ്പയെടുക്കുന്ന തുകയെങ്കിലും വിവേകപൂര്‍വ്വം വിനിയോഗിക്കണമെന്ന് മുന്‍ കേന്ദ്ര മന്ത്രിയും ബിജെപി നേതാവുമായ രാജീവ് ചന്ദ്രശേഖര്‍.സംസ്ഥാന സര്‍ക്കാരിന്റെ ധനകാര്യ മാനേജ്‌മെന്റില്‍ നിരവധി പോരായ്മകള്‍ നിലനില്‍ക്കുമ്പോഴും ജനങ്ങളുടെ ആശ്വാസം മുന്‍നിര്‍ത്തി 5,990 കോടി രൂപ കൂടി വായ്പ എടുക്കുന്നതിന് കേന്ദ്ര സര്‍ക്കാര്‍ അനുമതി നല്‍കിയതിന് കേരളത്തിലെ ജനങ്ങളുടെ പേരില്‍ ധനമന്ത്രി നിര്‍മ്മല സിതാരാമനോട് താന്‍ നന്ദി രേഖപ്പെടുത്തുന്നുവെന്നും അദ്ദേഹം പറഞ്ഞു.
രാഷട്രീയ പക്ഷപാതമില്ലാതെ ഏവരുടെയും വികസനവും ക്ഷേമവും ഉറപ്പാക്കുന്ന സബ് കാ സാത്ത് സബ് കാ വികാസ് എന്ന തത്വം യാഥാര്‍ത്ഥ്യമാക്കുന്നതില്‍ പ്രധാനമന്ത്രി നരേന്ദ്രമോദിയുടെ സര്‍ക്കാര്‍ പ്രതിജ്ഞാബദ്ധമാണെന്ന് ഇതിലൂടെ ഒരിക്കല്‍ കൂടി തെളിഞ്ഞിരിക്കുകയാണ്. അതേ സമയം കേരളത്തില്‍ ഒന്‍പത് വര്‍ഷമായി നടക്കുന്ന ഇടതു ഭരണത്തിന്റെ പാളിച്ചകള്‍ തിരിച്ചറിയേണ്ട സമയം കൂടിയാണിത്. ഇക്കാലമത്രയും മാറി മാറി നാടു ഭരിച്ച ഇടത് പാര്‍ട്ടികളും കോണ്‍ഗ്രസും കേരളത്തിന്റെ സാമ്പത്തിക സ്ഥിതിയെ പരമാവധി ദുര്‍ബലപ്പെടുത്തുകയും സംസ്ഥാനത്തെ സാമ്പത്തിക തകര്‍ച്ചയുടെ വക്കിലെത്തിക്കുകയും മാത്രമാണ് ചെയ്തത്.
കേരളത്തിന്റെ സാമ്പത്തിക പ്രതിസന്ധി നേരിടുന്നതിനായി കേന്ദ്രാനുമതിയോടെ എടുക്കുന്ന വായ്പയെങ്കിലും സംസ്ഥാന സര്‍ക്കാര്‍ വിവേകത്തോടെയും കാര്യക്ഷമമായും വിനിയോഗിക്കണമെന്നും ആശാ പ്രവര്‍ത്തകര്‍ക്കും കെഎസ്ആര്‍ടിസി ജീവനക്കാര്‍ക്കും കേരളത്തിലെ ജനങ്ങള്‍ക്കും മതിയായ ആശ്വാസം അതിലൂടെ ഉറപ്പാക്കണമെന്നും രാജീവ് ചന്ദ്രശേഖര്‍ അഭ്യര്‍ത്ഥിച്ചു.അന്താരാഷ്ട്ര തലത്തില്‍ ദുര്‍ബലമായ അഞ്ച് സമ്പദ് വ്യവസ്ഥകളില്‍ ഒന്നായിരുന്ന ഇന്ത്യ പ്രധാനമന്ത്രി മോദിക്ക് കീഴില്‍ ഇന്ന് ലോകത്തിലെ ഏറ്റവും മികച്ച സാമ്പത്തിക ശക്തിയായി ഉയര്‍ന്നിരിക്കുന്നു. കേരളത്തിന്റെ സമ്പദ്വ്യവസ്ഥ അതേ സമയം താഴേക്ക് പൊയ്‌ക്കൊണ്ടിരിക്കുകയാണ്. കേരളം മാറണം. കേരള രാഷ്ട്രീയത്തില്‍ ഒരു മാറ്റമുണ്ടായാല്‍ അത് മാറുക തന്നെ ചെയ്യും. കാര്യക്ഷമതയുള്ള ഭരണത്തിന്റെ രാഷ്ട്രീയം കേരളത്തിന് ആവശ്യമാണെന്ന സത്യം ഇനിയെങ്കിലും നമ്മള്‍ തിരിച്ചറിയണമെന്നും രാജീവ് ചന്ദ്രശേഖര്‍ പറഞ്ഞു.
