തിരുവനന്തപുരം: മോന്‍സണ്‍ മാവുങ്കല്‍ പ്രതിയായ കേസില്‍ ഇടനിലക്കാരിയായി പ്രവര്‍ത്തിച്ച അനിത പുല്ലയില്‍ എങ്ങനെ സര്‍ക്കാര്‍ സംഘടിപ്പിച്ച ലോക കേരള സഭയില്‍ പങ്കെടുത്തെന്ന് കോണ്‍ഗ്രസ് കെ.മുരളീധരന്‍.എം.പി ചോദിച്ചു.
പാസ് ഇല്ലാതെ അനിത പുല്ലയില്‍ എങ്ങനെ നിയമസഭയ്ക്ക് അകത്ത് കയറി. ഹിറ്റ് ലിസ്റ്റിലും ബ്ലാക്ക് ലിസ്റ്റിലും ഉള്ളവര്‍ എങ്ങനെ കടന്നു. സ്പീക്കര്‍ക്ക് എന്തുകൊണ്ട് തടയാനായില്ല. ഇതിന് സ്പീക്കര്‍ മറുപടി പറയണമെന്നും കെ.മുരളീധരന്‍ പറഞ്ഞു. കളങ്കിതരായ ആളുകള്‍ ഭരണത്തിന്‍റെ പങ്ക് പറ്റുകയാണെന്നും കെ.മുരളീധരന്‍ ആരോപിച്ചു.
ലോക കേരള നിയമസഭയുമായി ബന്ധപ്പെട്ട് വ്യവസായി എം എ യൂസഫലി നടത്തിയ പ്രതികരണത്തിലും കെ. മുരളീധരന്‍ മറുപടി നല്‍കി. യൂസുഫലിയുടെ അഭിപ്രായത്തിനനുസരിച്ച്‌ കോണ്‍ഗ്രസ് നിലപാട് മാറ്റില്ലെന്ന് കെ.മുരളീധരന്‍ പറഞ്ഞു.
കോണ്‍ഗ്രസിന് പ്രവാസികളോട് സ്നേഹമുണ്ട്. എന്നാല്‍ സര്‍ക്കാരിന്‍റെ ലോക കേരള സഭ കൊണ്ട് ഒരു ഉപകാരവും പ്രവാസികള്‍ക്കില്ലെന്നും കെ.മുരളീധരന്‍ പറഞ്ഞു.
സ്വര്‍ണ കളളക്കടത്തുമായി ബന്ധപ്പെട്ട് മുഖ്യമന്ത്രിക്കെതിരെ ഉയര്‍ന്ന ആരോപണങ്ങളില്‍ കൃത്യമായ അന്വേഷണം വേണം. ഹൈക്കോടതിയുടെ മേല്‍നോട്ടത്തില്‍ അന്വേഷണം വേണമെന്നും കെ മുരളീധരന്‍ ആവശ്യപ്പെട്ടു. അതുവരെ മുഖ്യമന്ത്രിക്ക് എതിരായ പ്രതിഷേധം തുടരും. മുഖ്യമന്ത്രിയുടെ പരിപാടികള്‍ ബഹിഷ്കരിക്കും. എന്നാല്‍നിയമസഭ സമ്മേളനത്തില്‍ പങ്കെടുക്കുമെന്നും കെ.മുരളീധരന്‍ പറഞ്ഞു.
അഗ്നി പഥ് പദ്ധതി വലിയ ജനരോഷമുണ്ടാക്കിയെന്ന് കെ.മുരളീധരന്‍ പറഞ്ഞു. ടെസ്റ്റ് എഴുതാനിരിക്കുന്നവര്‍ക്ക് നിയമനം കിട്ടില്ലെന്ന ആശങ്ക ഉണ്ട്. പദ്ധതിയില്‍ നിന്ന് കേന്ദ്രം പിന്മാറണമെന്നും കെ.മുരളീധരന്‍ പറഞ്ഞു.
