വിഎസ് മരുന്നുകളോട് പ്രതികരിക്കുന്നു; പ്രതീക്ഷയെന്ന് എംഎ ബേബി
ഹൃദയാഘാതത്തെ തുടര്ന്ന് ചികിത്സയില് കഴിയുന്ന മുന് മുഖ്യമന്ത്രി വിഎസ് അച്യുതാനന്ദനെ സന്ദര്ശിച്ച് സിപിഐഎം ജനറല് സെക്രട്ടറി എം എ ബേബി. നിലവില് ഇപ്പോള് നടക്കുന്ന ചികിത്സ മുന്നോട്ട് പോവുകയാണെന്നും ഡയാലിസിസ് തുടരുകയാണെന്നും അദ്ദേഹം പറഞ്ഞു.
വൈദ്യശാസ്ത്രത്തിന്റെ സഹായവും വിഎസിന്റെ നിശ്ചയദാര്ഢ്യവും കൊണ്ട് അദ്ദേഹം പ്രതിസന്ധി മറികടക്കുമെന്നാണ് പ്രതീക്ഷിക്കുന്നത്. ഗുരുതരാവസ്ഥയിലാണെങ്കിലും അദ്ദേഹം മരുന്നുകളോട് പ്രതികരിക്കുന്നുണ്ടെന്നും എം എ ബേബി കൂട്ടിച്ചേര്ത്തു.
ആന്തരികാവയവങ്ങളുടെ പ്രവര്ത്തനം കാര്യക്ഷമമല്ലെന്നാണ് സര്ക്കാര് നിയോഗിച്ച തിരുവനന്തപുരം മെഡിക്കല് കോളേജിലെ വിദഗ്ധ ഡോക്ടര്മാരുടെ സംഘത്തിന്റെ വിലയിരുത്തല്. രക്തസമ്മര്ദ്ദവും വൃക്കകളുടെ പ്രവര്ത്തനവും സാധാരണ നിലയില് എത്തിക്കാനുള്ള ശ്രമം തുടരുകയാണ്. വിദഗ്ധ സംഘത്തിന്റെ കൂടി അഭിപ്രായം കണക്കിലെടുത്ത് ആരംഭിച്ച ഡയാലിലിസ് തുടരുകയാണ്. കഴിഞ്ഞ തിങ്കളാഴ്ച രാവിലെയാണ് ഹൃദയാഘാതത്തെ തുടര്ന്ന് വിഎസിനെ തിരുവനന്തപുരം പട്ടത്തെ സ്വകാര്യ ആശുപത്രിയില് പ്രവേശിപ്പിച്ചത്.