സംസ്ഥാനത്ത് മഴ തുടരുമെന്ന് കാലാവസ്ഥാ നിരീക്ഷണ കേന്ദ്രം; നാല് ജില്ലകളില് യെല്ലോ അലര്ട്ട്
സംസ്ഥാനത്ത് വേനല് മഴ ജാഗ്രത നിര്ദേശം തുടരുന്നു. ഇന്ന് തിരുവനന്തപുരം, പത്തനംതിട്ട, മലപ്പുറം, വയനാട് ജില്ലകളിലാണ് യെല്ലോ അലര്ട്ട് പ്രഖ്യാപിച്ചു. മുന്നറിയിപ്പുള്ള ജില്ലകളില് ഒറ്റപ്പെട്ടയിടങ്ങളില് ശക്തമായ മഴക്കും ഇടിയോടു കൂടിയ മഴക്കും സാധ്യതയുണ്ട്.
തെക്കന് തമിഴ്നാടിന് മുകളിലും തെക്കന് ആന്ഡമാന് കടലിന് മുകളിലുമായി നിലനില്ക്കുന്ന ചക്രവാതചുഴിയും,അറബിക്കടലില് നിന്നും ബംഗാള് ഉള്ക്കടലില് നിന്നും വരുന്ന കാറ്റുമാണ് മഴയ്ക്ക് കാരണമെന്ന് കേന്ദ്ര കാലാവസ്ഥ വകുപ്പ് അറിയിച്ചു.ഇന്നലെയും സംസ്ഥാനത്തിന്റെ വിവിധ ഭാഗങ്ങളില് പരക്കെ വേനല് മഴ ലഭിച്ചിരുന്നു. ഇടിമിന്നലോടുകൂടിയ മഴയ്ക്കും മണിക്കൂറില് 30 മുതല് 40 കിലോമീറ്റര് വരെ വേഗതയില് ശക്തമായ കാറ്റിനും സാധ്യതയുണ്ടെന്നാണ് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്.
അതേസമയം, സംസ്ഥാനത്തെ കനത്ത വേനല്മഴയില് കോഴിക്കോട് ചാത്തമംഗലത്ത് വീട്ടമ്മ മിന്നലേറ്റ് മരിച്ചു. ഇടുക്കിയില് കനത്ത മഴയില് കല്ലും മണ്ണും ദേഹത്ത് വീണ് തമിഴ്നാട് സ്വദേശി അയ്യാവാണ് മരിച്ചത്. മുണ്ടക്കയത്ത് തൊഴിലുറപ്പ് തൊഴിലാളികള്ക്ക് മിന്നലേറ്റു. വിവിധ ഭാഗങ്ങളില് നാശനഷ്ടങ്ങള് റിപ്പോര്ട്ട് ചെയ്തിട്ടുണ്ട്. ഇടിമിന്നലില് ഇടുക്കി നെടുങ്കണ്ടത്തും തിരുവനന്തപുരം വെള്ളറയിലും വീട് തകര്ന്നു. ഇടുക്കിയില് പ്രകാശ്ഗ്രാം പാറയില് ശശിധരന്റെ വീടും വെള്ളറട,കിളിയൂരില് സത്യരാജിന്റെ വീടുമാണ് തകര്ന്നത്. പാലക്കാട് അമ്പലപ്പാറയില് ശക്തമായ കാറ്റിലും മഴയിലും വീട് തകര്ന്നു.