രാഹുല് ഗാന്ധിയുടെ ഓഫീസിന് നേരെ ആക്രമം
വയനാട് എം.പി രാഹുല് ഗാന്ധി യുടെ കല്പ്പറ്റയിലെ ഓഫീസ് അടിച്ച് തകര്ത്ത് എസ്എഫ്ഐ പ്രവര്ത്തകര്. ബഫര്സോണ് ഉത്തരവില് രാഹുല് ഗാന്ധി ഇടപെടുന്നില്ലെന്ന് ആരോപിച്ചായിരുന്നു അതിക്രമം. ഓഫീസിലേക്ക് പ്രവര്ത്തകര് തള്ളിക്കയറി സാധനങ്ങള് അടിച്ചുതകര്ത്തതായി കോണ്ഗ്രസ് ആരോപിച്ചു. പ്രവര്ത്തകര് ഓഫീസിലേക്ക് തള്ളി കയറിയതോടെ പൊലീസ് ലാത്തിവീശി. പൊലീസ് ലാത്തിച്ചാര്ജില് നിരവധി പ്രവര്ത്തകര്ക്ക് പരിക്കേറ്റു.
രാഹുല് ഗാന്ധിയുടെ ഓഫീസ് സ്റ്റാഫ് അഗസ്റ്റിന് പുല്പ്പള്ളിയ്ക്കും മര്ദ്ദനമേറ്റതായും കോണ്ഗ്രസ് ആരോപിച്ചു. രാഹുല് ഗാന്ധിയുടെ ഓഫീസ് എസ്എഫ്ഐ പ്രവര്ത്തകര് ആക്രമിച്ച സംഭവത്തില് മുഖ്യമന്ത്രി മറുപടി പറയണമെന്ന് എഐസിസി ജനറല് സെക്രട്ടറി കെ സി വേണുഗോപാല് ആവശ്യപ്പെട്ടു.
എന്നാല് പരിസ്ഥിതി ദുര്ബലമേഖലയിലെ ബഫര് സോണുമായി ബന്ധപ്പെട്ട് കേരളത്തിലെ കര്ഷകരുടെ ആശങ്കകള് രാഹുല് ഗാന്ധി ഇന്നലെ ചര്ച്ച ചെയ്തിരുന്നു. എംഎല്എമാരുമായി ചര്ച്ച നടത്തിയ രാഹുല് ഗാന്ധി, വയനാട്ടിലെ സാഹചര്യം വിലയിരുത്തിയിരുന്നു. നിര്ദ്ദേശത്തില് ഭേദഗതിക്ക് വേണ്ടി കേന്ദ്രത്തില് സമ്മര്ദ്ദം ചെലുത്തുമെന്നും രാഹുല് ഗാന്ധി അറിയിച്ചിരുന്നു.