പത്തനംതിട്ട: കോന്നി റീജിയണൽ സർവ്വീസ് സഹകരണ ബാങ്കിന് മുന്നിൽ കോൺഗ്രസിൻ്റെ പ്രതിഷേധ സമരം. നിക്ഷേപകൻ ആത്മഹത്യ ചെയ്യാൻ ശ്രമിച്ച സംഭവത്തിലാണ് പ്രതിഷേധം. ബാങ്ക് ഭരണ സമിതി നിക്ഷേപകരെ ആത്മഹത്യയിലേക്ക് തള്ളി വിടുകയാണെന്ന് കോൺഗ്രസ് നേതൃത്വം ആരോപിച്ചു. ബാങ്കിലെ നിക്ഷേപകൻ ആനന്ദൻ കഴിഞ്ഞ ദിവസം ആത്മഹത്യയ്ക്ക് ശ്രമിച്ചിരുന്നു. പത്ത് ലക്ഷം രൂപയാണ് ആനന്ദന് ബാങ്കിൽ നിക്ഷേപമുള്ളത്. ആനന്ദൻ കോട്ടയം മെഡിക്കൽ കോളേജ് ആശുപത്രിയിൽ ഗുരുതരാവസ്ഥയിൽ ചികിൽസയിൽ തുടരുകയാണ്
ഈ മാസം പത്തിനായിരുന്നു നിക്ഷേപത്തുക തിരികെ ലഭിക്കാത്തതിനെ തുടര്‍ന്ന് ആനന്ദൻ ആത്മഹത്യക്ക് ശ്രമിച്ചത്. ആനന്ദന് 10 ലക്ഷം രൂപ കോന്നി റീജിയണല്‍ സഹകരണ ബാങ്കില്‍ നിന്ന് ലഭിക്കാനുണ്ടെന്നും ഇത് ലഭിക്കാതെ വന്നതാണ് പിതാവിനെ ആത്മഹത്യയിലേക്ക് നയിച്ചതെന്നും കുടുംബം ആരോപിച്ചു. നിലവിൽ കോട്ടയം മെഡിക്കല്‍ കോളേജ് ആശുപത്രിയില്‍ വെന്റിലേറ്ററിലാണ് ആനന്ദന്. നേരത്തെ കോന്നി റീജിയണല്‍ സഹകരണ ബാങ്കിന് മുന്നില്‍ ആനന്ദന് കുത്തിയിരിപ്പ് സമരം നടത്തിയിരുന്നു
