സ്പൈനല് മസ്കുലര് അട്രോഫി രോഗം ബാധിച്ച കുട്ടികള്ക്ക് 12 വയസുവരെ സൗജന്യ മരുന്ന്; ആശ്വാസകരമായ തീരുമാനം പ്രഖ്യാപിച്ച് ആരോഗ്യമന്ത്രി
തിരുവനന്തപുരം: അപൂര്വ രോഗമായ സ്പൈനല് മസ്കുലര് അട്രോഫി (എസ്.എം.എ) അസുഖം ബാധിച്ച കുട്ടികള്ക്കുള്ള സൗജന്യ മരുന്ന് വിതരണത്തിന്റെ പ്രയപരിധി ഉയര്ത്തി. 6 വയസ് വരെയുള്ള കുട്ടികള്ക്ക് നല്കിയിരുന്ന മരുന്നാണ് 12 വയസ് വരെയാക്കിയത്. വില കൂടിയ മരുന്ന് കൂടുതല് കുട്ടികള്ക്ക് ലഭ്യമാക്കാനാണ് ഇത്തരമൊരു തീരുമാനം. ഇതുവരെ 57 കുട്ടികള്ക്കാണ് മരുന്ന് നല്കിയത്. ഒരു ഡോസിന് 6 ലക്ഷത്തോളം രൂപ വരുന്ന 600 യൂണിറ്റോളം റിസ്ഡിപ്ലാം മരുന്നാണ് ഇതുവരെ നല്കിയത്. ഈ കുട്ടികളെല്ലാം തന്നെ രോഗം ശമിച്ച് കൂടുതല് ബലമുള്ളവരും കൂടുതല് ചലനശേഷിയുള്ളവരുമായി മാറിയിയിട്ടുണ്ട്. 12 വയസ് വരെ ചികിത്സ ഉയര്ത്തുമ്പോള് 23 കുട്ടികള്ക്കും കൂടി മരുന്ന് നല്കാനാകുമെന്ന് ആരോഗ്യമന്ത്രി വീണ ജോര്ജ് അറിയിച്ചു.
ഇന്ത്യയില് ആദ്യമായാണ് അപൂര്വ രോഗത്തിനുള്ള മരുന്നുകള് സര്ക്കാര് തലത്തില് സൗജന്യമായി നല്കുന്നത്. സംസ്ഥാനത്ത് 6 വയസ് വരെ പ്രായമുള്ള കുട്ടികള്ക്ക് ഒന്നര വര്ഷത്തിലേറെയായി സൗജന്യ മരുന്ന് നല്കുന്നുണ്ട്. അപൂര്വ രോഗം ബാധിച്ചവരുടെ ചികിത്സയ്ക്കായി തിരുവനന്തപുരം എസ്.എ.ടി. ആശുപത്രിയില് എസ്.എം.എ. ക്ലിനിക് ആരംഭിച്ചിരുന്നു. എസ്.എം.എ. ബാധിച്ച കുട്ടികളില് ഉണ്ടാകുന്ന നട്ടെല്ലിലെ വളവ് പരിഹരിക്കുന്ന അതിനൂതനമായ ശസ്ത്രക്രിയ സര്ക്കാര് മേഖയില് ആദ്യമായി തിരുവനന്തപുരം മെഡിക്കല് കോളേജ് ആശുപത്രിയില് വിജയകരമായി നടത്തുകയും ചെയ്തു. ഇതുവരെ 5 ശസ്ത്രക്രിയകളാണ് നടത്തിയത്. സ്വകാര്യ ആശുപത്രികളില് 15 ലക്ഷത്തോളം ചെലവുള്ള ശസ്ത്രക്രിയയാണ് മെഡിക്കല് കോളേജുകളില് സൗജന്യമായി നടത്തുന്നത്.
നവകേരള സദസ്സിനിടെ എസ്.എം.എ. ബാധിതയായ കോഴിക്കോട് സ്വദേശിയുമായ സിയ മെഹ്റിനാണ് 6 വയസിന് മുകളിലുള്ള കുട്ടികള്ക്കും ലഭ്യമാക്കിയാല് സഹായകരമാണെന്ന് മുഖ്യമന്ത്രിയെ അറിയിച്ചത്. ഇക്കാര്യം പരിശോധിച്ച് നടപടിയെടുക്കാന് മുഖ്യമന്ത്രി ആരോഗ്യ വകുപ്പിന് നിര്ദേശം നല്കിയിരുന്നു.