പാലക്കാട്: ഹെഡ്‌ഗേവാർ വിവാദത്തെ തുടർന്ന് പാലക്കാട് നഗരസഭയിൽ ചില അക്രമ സംഭവങ്ങൾ അരങ്ങേറി. യുഡിഎഫും എൽഡിഎഫും നടത്തിയ പ്രതിഷേധം ബഹളത്തിൽ കലാശിച്ചു. നഗരസഭാ കൗൺസിൽ യോഗത്തിൽ വനിതാ കൗൺസിലർമാർ തമ്മിൽ സംഘർഷമുണ്ടായി.
നഗരസഭാ അധ്യക്ഷ പ്രമീള ശശിധരന്റെ ചേംബറിന് മുന്നിൽ പ്രതിഷേധം അരങ്ങേറി. അതേസമയം, ബിജെപി കൗൺസിലർമാരും പ്രവർത്തകരും അവരെ സംരക്ഷിക്കാൻ ചേംബറിൽ കയറി. കൗൺസിലർമാരല്ലാത്തവർ എന്തിനാണ് ചെയർപേഴ്‌സന്റെ ചേംബറിൽ കയറിയതെന്ന് യുഡിഎഫ് ചോദിക്കുന്നു. ഇതും സംഘർഷത്തിലേക്ക് നയിച്ചു. സംഘർഷത്തിനിടെ വനിതാ കൗൺസിലർമാരിൽ ഒരാൾ ബോധംകെട്ടു വീണു. പാലക്കാട് നഗരസഭയിൽ ഭിന്നശേഷിക്കാർക്കായി പുതുതായി നിർമ്മിച്ച നൈപുണ്യ കേന്ദ്രത്തിന് ആർഎസ്എസ് നേതാവ് ഹെഡ്‌ഗേവാറിന്റെ പേര് നൽകിയതിനെതിരെയാണ് പ്രതിഷേധം ഉയർന്നത്. ‘ആരാണ് ഈ ഹെഡ്‌ഗേവാർ’ എന്ന പ്ലക്കാർഡുകൾ ഉയർത്തിപ്പിടിച്ചാണ് പ്രതിപക്ഷം പ്രതിഷേധിച്ചത്.
