മിഥുന്റെ മരണം; പ്രധാനാധ്യാപികയ്ക്ക് സസ്പെന്ഷന്, കുടുംബത്തിന് മൂന്നുലക്ഷം രൂപ ധനസഹായം : മന്ത്രി വി ശിവന്കുട്ടി
കൊല്ലം തേവലക്കരയില് വിദ്യാര്ത്ഥി മിഥുന് ഷോക്കേറ്റ് മരിച്ച സംഭവത്തില് സ്കൂള് പ്രധാനാധ്യാപികയ്ക്ക് സസ്പെന്ഷന്. ഉടന് സസ്പെന്റ് ചെയ്യാന് മാനേജ്മെന്റിന് നിര്ദേശം നല്കിയിട്ടുണ്ട്. മാനേജ്മെന്റ് ചെയ്തില്ലെങ്കില് സര്ക്കാര് സസ്പെന്റ് ചെയ്യുമെന്ന് മന്ത്രി ശിവന്കുട്ടി വാര്ത്താസമ്മേളനത്തില് അറിയിച്ചു. കുട്ടി മരിക്കാനിടയായ സംഭവത്തില് സ്കൂള് മാനേജ്മെന്റിനോട് വിശദീകരണം തേടിയിട്ടുണ്ട്. ഇതിന് മൂന്നു ദിവസത്തിനകം മാനേജ്മെന്റ് മറുപടി നല്കണമെന്നും മന്ത്രി നിര്ദേശിച്ചു. മാനേജ്മെന്റിനെതിരെ നടപടിയെടുക്കാന് സര്ക്കാരിന് അധികാരമുണ്ടെന്നും മന്ത്രി ശിവന്കുട്ടി പറഞ്ഞു.
മരിച്ച മിഥുന്റെ കുടുംബത്തിന് ധനസഹായം നല്കണമെന്നും മാനേജ്മെന്റിനോട് സര്ക്കാര് ആവശ്യപ്പെട്ടു. പിടിഎ പുനഃസംഘടിപ്പിക്കണമെന്നും നിര്ദേശിച്ചിട്ടുണ്ട്. അധ്യയനവര്ഷം ആരംഭിക്കുന്നതിനു മുമ്പ് ഇത്തരത്തിലുള്ള കാര്യങ്ങളെല്ലാം പരിശോധിക്കണമെന്ന് ആവശ്യപ്പെട്ട് സംസ്ഥാനത്തെ എല്ലാ വിദ്യാലയങ്ങള്ക്കും സര്ക്കാര് സര്ക്കുലര് നല്കിയിരുന്നതാണ്. എന്നാല് കുട്ടി മരിക്കാനിടയായ വീഴ്ചയുണ്ടായ സംഭവത്തില് സ്കൂളിന്റെ ചുമതലയുണ്ടായിരുന്ന എഇഒ ആന്റണി പീറ്ററിനോട് വിശദീകരണം തേടും. ഇതിനുശേഷം നടപടി തീരുമാനിക്കുമെന്ന് മന്ത്രി അറിയിച്ചു. മിഥുന്റെ കുടുംബത്തിന് അടിയന്തര സഹായമായി പൊതു വിദ്യാഭ്യാസ വകുപ്പിന്റെ പിഡി അക്കൗണ്ടില് നിന്നും മൂന്നുലക്ഷം രൂപ നല്കും.