പ്രതിപക്ഷം നേട്ടങ്ങള് കണ്ടില്ലെന്ന് നടിക്കുന്നു; വികസനത്തിന് പിന്തുണ വേണമെന്ന് പിണറായി വിജയന്
കണ്മുന്നിലുള്ള നേട്ടങ്ങള് പ്രതിപക്ഷം കണ്ടില്ലെന്ന് നടിക്കുകയാണെന്ന് മുഖ്യമന്ത്രി. നല്ല കാര്യങ്ങള്ക്ക് പിന്തുണ നല്കണമെന്നും അദ്ദേഹം ആവശ്യപ്പെട്ടു. കോഴിക്കോട് കല്ലുത്താന് കടവിലെ പുതിയ മാര്ക്കറ്റ് കെട്ടിടം ഉദ്ഘാടനം ചെയ്ത് സംസാരിക്കുകയായിരുന്നു മുഖ്യമന്ത്രി.
ഒരുപാട് നാടകങ്ങള് കാണേണ്ട സാഹചര്യമാണുള്ളത്. പ്രതിഷേധക്കാരുടെ കൂടെ നിന്നവരില് ചിലര് ഇപ്പോഴില്ല. എന്താണ് നല്ല കാര്യത്തെ അംഗീകരിക്കാത്തത്? എന്താണ് ഇതിനുപിന്നിലെ ചേതോവികാരം? നാടിന് ഗുണം ചെയ്യുന്ന കാര്യം അംഗീകരിക്കേണ്ടത് അല്ലേ? മത്സരം തെരഞ്ഞെടുപ്പില് മാത്രമാണ്.
തിരഞ്ഞെടുപ്പ് കഴിഞ്ഞാല് വികസനത്തെ പിന്തുണക്കണം.പ്രതിപക്ഷം ഉദ്ഘാടന പരിപാടിയില് നിന്നും വിട്ട് നില്ക്കുന്നു.കോണ്ഗ്രസ് -ലീഗ് അംഗങ്ങള് ആരുമില്ല. സ്ഥലം എംപിയും പരിപാടിയില് ഇല്ല. എല്ലാകാര്യത്തെയും എതിര്ക്കുന്നത് ആണോ പ്രതിപക്ഷം?
ജനങ്ങള് എല്ലാം തിരിച്ചറിയുന്നുണ്ട്. പ്രതിപക്ഷം തിരുത്തുമെന്ന് കരുതുന്നില്ല. അത് ജനങ്ങള് മനസിലാക്കുമെന്നും ഈ പദ്ധതി സംസ്ഥാനത്തിന് മാതൃകയാണെന്നും മുഖ്യമന്ത്രി പിണറായി വിജയന് പറഞ്ഞു.
കോഴിക്കോട് പാളയം പച്ചക്കറി മാര്ക്കറ്റാണ് കല്ലുത്താന് കടവിലേക്ക് മാറ്റുന്നതില് ഒരു വിഭാഗം വ്യാപാരികള് പ്രതിഷേധവുമായി രംഗത്തെത്തിയിരുന്നു. ഉദ്ഘാടനത്തിന് മുമ്പായി പാളയം മാര്ക്കറ്റ് മാറ്റുന്നതിനെ അനുകൂലിക്കുന്നവരും എതിര്ക്കുന്നവരും തമ്മില് സംഘര്ഷവുമുണ്ടായിരുന്നു.