കോൺഗ്രസ് വിട്ടവർ ബലിമൃഗങ്ങൾ: ചെറിയാൻ ഫിലിപ്പ്

തിരുവനന്തപുരം:കോൺഗ്രസ് വിട്ട് സി.പി.എം ലും ബി.ജെ.പിയിലും ചേർന്നവർ ബലിമൃഗങ്ങളാണെന്ന് കെ.പി.സി സി മാധ്യമ സമിതി ചെയർമാൻ ചെറിയാൻ ഫിലിപ്പ്

ജീവൻ നിലനിർത്താൻ അപ്പക്കഷണങ്ങൾ നൽകുമെങ്കിലും താമസിയാതെ ഇവരെല്ലാം കുരുതി കഴിക്കപ്പെടും. രാഷ്ട്രീയപൈതൃകമോ സംഘടനാശേഷിയോ നേതൃത്വപാടവമോ അല്ല ഉപയോഗക്ഷമതയാണ് പ്രധാനം. ന്യൂനപക്ഷ വോട്ടുകൾ മറിക്കാൻ കഴിവുള്ള ജാതി – മത ശക്തികളുടെ ഏജന്റുമാരെയാണ് സി.പി.എം നും ബി.ജെ.പിക്കും വേണ്ടത്.

സി.പി.എം അംഗത്വം എന്ന മരണക്കെണിയിൽ പെട്ടവർക്ക് ജീവനോടെ പുറത്തുകടക്കാനാവില്ല. കോൺഗ്രസിൽ ഉന്നത പദവികൾ ലഭിച്ചവർക്ക് സി.പി.എം ലോക്കൽ, ഏരിയ കമ്മറ്റികളുടെ വരാന്തയിൽ കഴിയേണ്ടിവരും. ക്രമേണ അവരുടെ രാഷ്ട്രീയ അസ്തിത്വം പൂർണ്ണമായും നഷ്ടപ്പെടും.

കോൺഗ്രസിൽ ലഭിച്ചിരുന്ന ജനാധിപത്യ സ്വാതന്ത്ര്യം അടിയറവെച്ച് മാനസിക അടിമത്വം പേറുന്നവർക്കു മാത്രമേ സി.പി.എം ലും ബി.ജെ.പി.യിലും തുടരാനാവൂ. കോൺഗ്രസ് അണികളിൽ നിന്നും ലഭിച്ചിരുന്ന സ്നേഹവും പിന്തുണയും അംഗീകാരവും ഇവർക്ക് ഒരിക്കലും ലഭിക്കില്ല.